تہران: امریکی صدر ڈونلڈ ٹرمپ کی ایران پر ممکنہ حملے کی دھمکی کے بعد، ایران کے سپریم لیڈر آیت اللہ خامنہ ای نے سخت الفاظ میں جواب دیا ہے۔
ٹرمپ نے خبردار کیا تھا کہ اگر ایران نے جوہری معاہدے پر دستخط نہ کیے تو اسے سنگین نتائج بھگتنا پڑیں گے، جن میں بمباری اور سخت اقتصادی پابندیاں شامل ہوں گی۔
ایران کے سپریم لیڈر آیت اللہ خامنہ ای نے اس دھمکی کو مسترد کرتے ہوئے واضح کیا کہ امریکا اور اسرائیل کی دشمنی کوئی نئی بات نہیں، لیکن اگر امریکا نے جارحیت کی کوشش کی تو اسے زبردست جواب دیا جائے گا۔
خامنہ ای نے مزید کہا کہ ایران کی خودمختاری پر کسی کو سودے بازی کی اجازت نہیں دی جائے گی اور اگر کسی نے اندرونی خلفشار پیدا کرنے کی کوشش کی تو ایرانی عوام خود اس کا مؤثر جواب دیں گے۔
واضح رہے کہ ٹرمپ نے ایران کو جوہری معاہدے پر آمادہ کرنے کے لیے ایک خط بھی ارسال کیا تھا، تاہم ایرانی قیادت نے براہ راست مذاکرات کو مسترد کرتے ہوئے کہا کہ صرف بالواسطہ سفارتی بات چیت ممکن ہے۔
