ممبئی (شوبز ڈیسک) گھریلو مسائل میں گِھرے بالی ووڈ اداکار نواز الدین نے گھر سے نکالی بیٹی کو واپس گھر میں داخلے کی اجازت دے دی۔
بالی ووڈ کے اداکار نواز الدین صدیقی جو ان دنوں اہل خانہ کے ساتھ جائیداد کے تنازع کے باعث شہ سرخیوں کی زینت بنے ہوئے ہیں۔ گزشتہ روز اہلیہ اور بچوں کو گھر سے نکالنے کے بعد اس حوالے سے اب ان کے بھائی شمس نواب الدین صدیقی کا بیان سامنے آیا ہے۔بھارتی میڈیا کے مطابق انہوں نے نواز الدین کے بھائی شمس الدین سے رابطہ کیا اور عالیہ صدیقی اور ان کے بچوں کی موجودہ حالات کے حوالے سے سوالات کئے۔
شمس الدین نے بتایا کہ ان کی بھابھی اور بچوں نے گزشتہ رات اپنے رشتہ دار کے یہاں گزاری، تاہم اب یہ معاملہ پولیس خود دیکھ رہی ہے اور عالیہ نواز اور بچوں کو گھر میں داخل ہونے کی اجازت دلوائیگی۔انہوں نے بنگلے کی ملکیت کے حوالے سے پوچھے گئے سوال کا جواب دیتے ہوئے کہا کہ نواز الدین نے یہ بنگلہ صرف زبانی والدہ کے نام کیا تھا اس کی کوئی کاغذی کارروائی نہیں ہوئی تھی، اس لئے قانونی اعتبار سے اب بھی اس بنگلے کا مالک نواز الدین ہی ہے۔
ایک اور سوال کے جواب میں انہوں نے بتایا کہ عالیہ نے نواز الدین سے رابطہ کرنے کی کوشش کی تاہم انہیں کوئی جواب موصول نہیں ہوا البتہ جب 12سالہ بیٹی شورہ نے رابطہ کرنا چاہا اور بنگلے کے اندر جانے کی اجازت طلب کی تو نوازالدین نے صرف اسے اکیلے ہی گھر میں جانے کی اجازت دی اور دیگر افراد کے حوالے سے سختی سے منع کردیا۔