پاکستان کے شہر لاہور کو 2027 کے لیے ای سی او کا سیاحتی دارالحکومت نامزد کر دیا گیا ہے، جو کہ پاکستان اور صوبہ پنجاب کے لیے ایک اہم عالمی اعزاز ہے۔ ای سی او کی 10 ممالک کی معاشی تعاون تنظیم نے اس فیصلے کا اعلان کیا ہے۔
ای سی او کا 25 رکنی وفد 13 اپریل سے لاہور کا دورہ شروع کرے گا، جہاں لاہور کو باضابطہ طور پر ‘ای سی او ٹورازم کیپٹل’ قرار دیا جائے گا۔ ای سی او کے سفیر وزیراعلیٰ پنجاب مریم نواز کی دعوت پر لاہور آئیں گے۔
یاد رہے کہ اس سے قبل ازبکستان کے شہرِ سبز کو یہ اعزاز مل چکا ہے، اور ترکیہ کے شہر اَذرُوم کو 2025 کے لیے ‘ای سی او ٹورازم کیپٹل’ منتخب کیا گیا ہے۔
ای سی او میں ترکیہ، ایران، افغانستان، پاکستان کے علاوہ آذربائیجان، قزاقستان، کرغزستان، تاجکستان، ترکمانستان اور ازبکستان شامل ہیں۔ ہر سال ای سی او اس اعزاز کے لیے ایک رکن ملک کے شہر کو منتخب کرتا ہے۔
لاہور کو یہ اعزاز اس کی بھرپور تاریخی، ثقافتی اور سیاحتی ورثے کی بنا پر دیا گیا ہے۔ اس منصوبے کا مقصد ای سی او خطے کے تاریخی، ثقافتی اور سیاحتی ورثے کو دنیا بھر میں اجاگر کرنا ہے۔ وزیراعلیٰ پنجاب کی میزبانی میں ای سی او کی مستقل مندوبین کونسل کا اجلاس سول سیکریٹریٹ میں منعقد ہوگا، اور وفد لاہور کے مختلف تاریخی مقامات اور سیف سٹیز اتھارٹی کا دورہ بھی کرے گا۔
سینئر صوبائی وزیر پنجاب مریم اورنگزیب نے کہا کہ لاہور کا یہ اعزاز ملک و صوبے کے تاریخی و ثقافتی ورثے کو اجاگر کرنے کے لیے اہم قدم ہے۔ وزیراعلیٰ مریم نواز لاہور کی ثقافت اور تاریخی رنگ دنیا کو دکھانا چاہتی ہیں، اور لاہور کا ‘ای سی او ٹورازم کیپٹل’ نامزد ہونا سیاحت کے فروغ کے لیے اہم سنگ میل ثابت ہوگا۔
