عمران خان اور بشری بی بی کو سحر و افطار میں کچھ نہیں دیا جا رہا،بیرسٹر سیف کا دعوی

پشاور(نیوز رپورٹر)مشیر اطلاعات خیبر پختونخوا بیرسٹر سیف نے دعوی کیا ہے کہ عمران خان اور بشری بی بی کو سحر و افطار میں کچھ نہیں دیا جا رہا۔

اپنے بیان میں ترجمان کے پی حکومت بیرسٹر سیف نے کہا کہ عمران خان سے ملاقاتوں پر پابندی، رمضان المبارک میں اذیت دینا ہے۔

اطلاعات ہیں کہ عمران خان اور بشری بی بی کو سحری و افطار میں کچھ فراہم نہیں کیا جا رہا۔انہوں نے دعوی کیا کہ دونوں کو مجبورا نہار منہ روزہ رکھنا پڑ رہا ہے۔ انہیں عبادات سے بھی روکا جا رہا ہے۔بیرسٹر سیف کا کہنا تھا کہ جعلی حکومت کے اوچھے ہتھکنڈوں کے باعث عوام میں شدید تشویش پائی جاتی ہے۔

جعلی حکومت ایک قیدی سے خوفزدہ ہے۔ ملاقاتوں پر پابندی عدالتی احکامات کی کھلم کھلا خلاف ورزی ہے۔صوبائی مشیر نے اپنے بیان میں کہا کہ عدالت کو 26 ویں آئینی ترمیم کی زنجیریں توڑ کر توہینِ عدالت کی کارروائی کرنی چاہیے۔