سونا عوام کی دسترس سے باہر! عالمی کشیدگی کے باعث قیمتوں میں طوفانی اضافہ

لاہور: سونے کے خریداروں کے لیے ایک اور بری خبر! روس اور یوکرین کے درمیان کشیدہ صورتحال کے نتیجے میں عالمی بلین مارکیٹ میں سونے کی مانگ میں زبردست اضافہ دیکھا گیا، جس نے قیمتوں کو نئی بلندیوں تک پہنچا دیا ہے۔

بین الاقوامی منڈی میں سونے کی فی اونس قیمت 59 ڈالر بڑھ کر حیران کن طور پر 3,347 ڈالر تک جا پہنچی۔ اس عالمی اضافے کے اثرات پاکستان کی مقامی صرافہ مارکیٹ پر بھی فوری طور پر مرتب ہوئے۔

پیر کے روز پاکستان میں فی تولہ 24 قیراط سونا 5,900 روپے کے زبردست اضافے کے بعد 3 لاکھ 53 ہزار 100 روپے کی بلند ترین سطح پر جا پہنچا۔ اس کے ساتھ ساتھ 10 گرام سونے کی قیمت میں بھی 5,058 روپے کا نمایاں اضافہ ریکارڈ کیا گیا، جس سے نئی قیمت 3 لاکھ 2 ہزار 726 روپے ہو گئی۔

دوسری جانب، چاندی کی قیمتوں میں کوئی تبدیلی نہیں آئی۔ فی تولہ چاندی 3,356 روپے جبکہ 10 گرام چاندی 2,962 روپے پر مستحکم رہی۔

ملکی معاشی حالات اور عالمی کشیدگی کے تناظر میں سونے کی قیمت میں یہ اچانک اضافہ عوامی پریشانیوں میں مزید اضافہ کر رہا ہے، خاص طور پر اُن کے لیے جو شادی یا سرمایہ کاری کے لیے سونا خریدنے کا سوچ رہے تھے۔