خیبرپختونخوا کی سیاست میں نئی تاریخ — علی امین گنڈا پور دو سال سے کم مدت میں عہدہ چھوڑنے والے پانچویں وزیراعلیٰ بن گئے

خیبرپختونخوا کی سیاسی تاریخ میں ایک اور منفرد باب کا اضافہ ہوگیا، جب علی امین گنڈا پور دو سال سے کم مدت میں وزارتِ اعلیٰ کا منصب چھوڑنے والے پانچویں وزیراعلیٰ بن گئے۔

علی امین گنڈا پور کو عام انتخابات 2024 کے بعد تحریک انصاف کی جانب سے وزیراعلیٰ کے لیے نامزد کیا گیا تھا۔ وہ یکم مارچ 2024 کو وزیراعلیٰ منتخب ہوئے اور اگلے ہی روز، دو مارچ کو اپنے عہدے کا حلف اٹھایا۔ یوں وہ تقریباً ایک سال سات ماہ تک اس منصب پر فائز رہے۔

خیبرپختونخوا کی تاریخ میں سب سے کم مدت کے وزیراعلیٰ مسلم لیگ (ن) کے پیر صابر شاہ تھے، جو صرف چار ماہ پانچ دن (20 اکتوبر 1993 تا 25 فروری 1994) تک عہدے پر رہے۔ اس کے بعد پیپلزپارٹی کے آفتاب احمد خان شیرپاؤ ایک سال سات ماہ اور 25 دن (2 دسمبر 1988 تا 7 اگست 1990) تک وزیراعلیٰ رہے۔

جے یو آئی (ف) کے بانی رہنما مفتی محمود مرحوم بھی 11 ماہ 15 دن (یکم مارچ 1972 تا 15 فروری 1973) تک اس عہدے پر فائز رہے۔ اسی طرح پیپلزپارٹی کے سردار عنایت اللہ گنڈا پور ایک سال 10 ماہ 17 دن (29 اپریل 1973 تا 16 فروری 1975) تک وزیراعلیٰ رہے۔

علی امین گنڈا پور کی مختصر مدت اقتدار نے نہ صرف صوبائی سیاست میں ایک نیا باب کھول دیا ہے بلکہ مستقبل میں خیبرپختونخوا کی سیاسی قیادت کے استحکام پر بھی نئے سوالات اٹھا دیے ہیں۔