برلن(نیوز ڈیسک)جرمن حکام نے روس پر الزام عائد کیا ہے کہ وہ ان سائبر حملوں کے پیچھے ہے جن میں میسجنگ ایپ سگنل استعمال کرنے والے ارکانِ پارلیمنٹ اور اعلی سطح کے حکومتی اہلکاروں کو سائبر حملوں کا نشانہ بنایا گیا۔
فرانسیسی خبر رساں ادارے کے مطابق ایک حکومتی ذریعے نے بتایا کہ وفاقی حکومت کا یہ ماننا ہے کہ سگنل میسجنگ سروس کو نشانہ بنانے والی فشنگ مہم ممکنہ طور پر روس سے چلائی جا رہی تھی۔ ذریعے نے مزید بتایا کہ اس فشنگ مہم کو روک دیا گیا ۔
یہ حملے صارفین کو بھیجے گئے ان پیغامات پر مبنی ہیں جن میں یہ دعوی کیا گیا تھا کہ وہ سگنل ایپ کی سروس کی جانب سے بھیجے گئے ہیں۔ ان پیغامات میں صارفین سے حساس معلومات فراہم کرنے کا مطالبہ کیا جاتا ہے جنہیں بعد میں اکائونٹس ہیک کرنے اور چیٹ گروپس، نجی پیغامات اور تصاویر تک رسائی حاصل کرنے کے لیے استعمال کیا جاتا ہے۔تاہم جرمن حکومت نے ابھی تک متاثرہ ارکانِ پارلیمنٹ کی تعداد پر کوئی تبصرہ نہیں کیا ۔
٭٭٭٭٭
