جامعہ کراچی میں داخلوں کیلیے امریکا، چین سمیت دیگر ممالک سے بھی درخواستیں

کراچی(تعلیم ڈیسک)جامعہ کراچی میں ایم فل اور پی ایچ ڈی پروگراموں کے داخلوں میں غیر ملکی طلبہ بھی دل چسپی لینے لگے ہیں۔

تفصیلات کے مطابق جامعہ کراچی کے ایم فل / پی ایچ ڈی پروگرامز کے داخلوں میں غیر ملکی طلبہ کی دل چسپی سامنے آئی ہے، اس سال ہونے والے داخلوں کے لیے امریکا، چین اور دیگر ممالک کے طلبہ کی جانب سے درخواستیں موصول ہوئی ہیں۔ایم فل / پی ایچ ڈی پروگراموں میں داخلوں کے لیے کراچی یونیورسٹی کو غیر ملکی طلبہ و طالبات کی جانب سے 12 درخواستیں موصول ہوئی ہیں۔

شیخ الجامعہ پروفیسر ڈاکٹر خالد محمود عراقی کے مطابق جامعہ کراچی کے پروگراموں میں داخلوں کے لیے درخواست جمع کرانے والوں میں 4 یمنی، 3 چینی، 2 افغانی جب کہ امریکا، سوڈان اور بنگلا دیش سے ایک ایک طالب علم شامل ہے۔ جامعہ کراچی کے شعبہ بین الاقوامی تعلقات میں گزشتہ برس ایک اطالوی طالب علم نے بھی داخلہ لیا تھا، جس کا کورس ورک مکمل ہو چکا ہے۔جامعہ کراچی اور چین کی سچوان نارمل یونیورسٹی نے پوسٹ گریجویٹ پروگرام کے لیے کوسپروائزر کی تعیناتی کی منظوری دے دی ہے۔

ڈاکٹر خالد عراقی کا کہنا ہے کہ ابتدائی مرحلے میں جامعہ کراچی چند مخصوص شعبہ جات کے طلبہ ’چینی کوسپروائزر‘ کا انتخاب کر سکیں گے، اگلے مرحلے میں بتدریج دیگر شعبہ جات کے طلبہ بھی چینی کوسپروائزر کا انتخاب کر سکیں گے۔