بیرون ملک سے آنے والے مسافروں کے لیے بڑی خوشخبری! ایف آئی اے نے وزیراعظم شہباز شریف کی ہدایت پر ملک بھر کے تمام بڑے بین الاقوامی ایئرپورٹس پر غیرملکی مسافروں کے لیے علیحدہ امیگریشن کاؤنٹرز قائم کر دیے ہیں تاکہ امیگریشن کے عمل کو مزید تیز، مؤثر اور بین الاقوامی معیار کے مطابق بنایا جا سکے۔
یہ سہولت کراچی، لاہور، اسلام آباد، پشاور، سیالکوٹ اور ملتان ایئرپورٹس پر مہیا کر دی گئی ہے۔ ترجمان ایف آئی اے کے مطابق ان اقدامات کا مقصد پاکستان میں سیاحت، غیر ملکی سرمایہ کاری اور کاروباری مواقع کو فروغ دینا ہے۔
نئے کاؤنٹرز کے قیام سے غیر ملکی سیاحوں، سرمایہ کاروں اور وفود کو امیگریشن پر لمبی قطاروں اور غیر ضروری تاخیر کا سامنا نہیں ہوگا، جبکہ وطن واپس آنے والے پاکستانیوں کے لیے بھی امیگریشن کا عمل مزید آسان اور تیز ہو جائے گا۔
حکومت پاکستان بین الاقوامی معیار کی سہولیات فراہم کرنے کے لیے پرعزم ہے تاکہ عالمی سطح پر پاکستان کا امیج بہتر ہو اور ملکی معیشت میں بہتری آئے۔
