اسلام آباد (کامرس ڈیسک) وزیرخزانہ اسحاق ڈار نے کہا ہے کہ پاکستان نے چینی بینکوں کو فاسٹ ٹریک کے تحت وقت سے پہلے ادائیگیاں کردیں، جلدی پیمنٹ کا کوئی جرمانہ بھی نہیں دیں گے،
چین سے تین چار روز میں پیسے واپس آجائیں گے، زرمبادلہ کے ذخائر میں کوئی تبدیلی نہیں ہوگی،شیل پاکستان میں اپنا بزنس بند نہیں کررہا، منفی باتیں پھیلانا درست نہیں۔انہوں نے پریس کانفرنس کرتے ہوئے کہا کہ ہمارا ایک پراسس رہا ہے کہ ہم پیمنٹ واپس کرتے ہیں پھر پاکستان کو دوبارہ پیسے مل جاتے ہیں،
30 جون کو رواں مالی سال ختم ہورہا ہے تو ہم نے چین کے بینکوں سے رابطہ کیا اوران کو آفر کی ہے کہ آخری ہفتے کی بجائے ہم پیمنٹ پہلے دیں گے، پہلے پیمنٹ سے بینک کچھ جرمانہ کرتے ہیں لیکن ہم نے کہا کہ جلدی پیمنٹ کی ہے تو کوئی جرمانہ نہیں دیں گے، ط
ے ہوا ہے کہ فاسٹ ٹریک سے ادائیگی کی جائے گی۔سوموار کو ہم نے پیمنٹ کی تھی اوروہ انہوں نے جمعے کو پیمنٹ پاکستان کو واپس کردی ہے، چینی بینکوں کو 300 ملین ڈالر کی ادائیگی بھی کردی گئی ہے، چینی بینکوں سے پاکستان کو 300 ملین ڈالرز مل جائیں گے، یہ 300 ملین ڈالر بھی پاکستان کو 3 یا 4روز میں واپس آجائیں گے، بیرونی ادائیگیوں کو یقینی بنایا جارہا ہے۔
تیسری بڑی ادائیگی 500، 500 ملین ڈالرز کی پیمنٹ یعنی ایک بلین کی پیمنٹ ہے، یہ بھی وقت سے پہلے کردی جائے گی۔ایک ریٹنگ ایجنسی نے کہا تھاکہ پاکستان مئی جون میں 3.7بلین ڈالر کیسے دے گا؟ کہا تھا کہ جب مئی جون آئے گا تو انتظام ہوجائے گا۔
ادائیگیاں کرنے سے زرمبادلہ کے ذخائر میں بھی کوئی تبدیلی نہیں ہوگی۔انہوں نے کہا کہ شیل کمپنی پاکستان میں اپنا بزنس بند نہیں کررہی،بلکہ پاکستان میں ان کا بزنس پہلے کی طرح ہی چلتا رہے گا۔ شیل اپنے شیئرز ایک اور فارن انویسٹر کو بیچنا چاہتا ہے، شیل صرف پاکستان میں نہیں کئی ممالک میں بزنس کررہا ہے۔اس بارے میں منفی باتیں پھیلانا درست نہیں۔شیل کمپنی جو بھی فیصلہ کرے گی وہ حکومتی فیصلوں پر عملدرآمد کی پابند ہے۔
