برطانیہ نے 15 جولائی 2025 سے پاکستانی طلبہ اور مختلف شعبوں کے ماہرین کے لیے ای ویزا کا نیا ڈیجیٹل سسٹم نافذ کر دیا ہے، جس کے بعد اب بیشتر درخواست دہندگان کو اپنے پاسپورٹ پر ویزا اسٹیکر لگوانے کی ضرورت نہیں پڑے گی۔
برطانوی حکومت نے اس جدید نظام کے تحت فزیکل امیگریشن دستاویزات کو ختم کرتے ہوئے ’’ای ویزا‘‘ یعنی ڈیجیٹل امیگریشن اسٹیٹس متعارف کرایا ہے، جو یو کے ویزا اینڈ امیگریشن (UKVI) اکاؤنٹ کے ذریعے آن لائن دیکھا جا سکتا ہے۔
اس نئے سسٹم سے نہ صرف ویزا پراسیسنگ تیز، محفوظ اور سہل ہوگی بلکہ درخواست دہندگان کو بار بار اصل دستاویزات جمع کرانے کی جھنجھٹ سے بھی نجات ملے گی۔
برطانوی ہائی کمشنر جین میریٹ کے مطابق اس ڈیجیٹل اصلاح کے ذریعے ویزا ہولڈرز اپنے پاسپورٹ اپنے پاس رکھ سکیں گے، جو نہ صرف وقت کی بچت کرے گا بلکہ سفر کو بھی آسان بنائے گا۔
یہ نظام ابتدا میں مخصوص ویزا کیٹیگریز پر لاگو کیا گیا ہے، جن میں طلبہ، ہیلتھ و کیئر ورکرز، گلوبل ٹیلنٹ، اسپورٹس پرسنز، کریئیٹو ورکرز، عارضی ورک روٹس، اور یوتھ موبیلٹی اسکیم شامل ہیں۔
ای ویزا رکھنے والے افراد اپنے UKVI اکاؤنٹ سے پاسپورٹ کو منسلک کر کے آسان بین الاقوامی سفر کر سکیں گے اور ’’ویو اینڈ پروو‘‘ سروس کے ذریعے برطانیہ میں آجر یا مکان مالک کو اپنے امیگریشن اسٹیٹس کی تصدیق بھی فراہم کر سکیں گے۔
تاہم سیاحتی ویزا یا ان کیٹیگریز کے لیے جہاں ڈیجیٹل نظام ابھی لاگو نہیں ہوا، فزیکل اسٹیکر ویزا بدستور درکار ہوگا۔
حکام کے مطابق جلد ہی یہ سہولت تمام اقسام کے ویزا پر نافذ کر دی جائے گی، جس سے برطانوی ویزا کا عمل مزید جدید، محفوظ اور صارف دوست بن جائے گا۔
