وزیرِ اعظم محمد شہباز شریف سے آذربائیجان کے وزیرِ معیشت میکائیل جباروف نے وفد کے ہمراہ ملاقات کی اور آذربائیجان کے صدر الہام علیوف کا خیرسگالی کا پیغام پہنچایا۔
ملاقات کے دوران پاکستان اور آذربائیجان کے درمیان تعاون کے مزید فروغ پر بات چیت کی گئی، خاص طور پر مختلف شعبوں میں سرمایہ کاری بڑھانے کی کوششوں پر۔ وزیرِ اعظم شہباز شریف نے آذربائیجان کے وفد کا خیرمقدم کرتے ہوئے کہا کہ دونوں ممالک کے درمیان دیرینہ برادرانہ تعلقات ہیں جو مشترکہ ثقافت، عقیدہ، احترام اور بھائی چارے پر مبنی ہیں۔
وزیرِ اعظم نے اپنے حالیہ دورہ آذربائیجان کا ذکر کرتے ہوئے دونوں ممالک کے درمیان دو طرفہ تعاون کے لیے مفاہمتی یادداشتوں اور معاہدوں پر عملدرآمد کا جائزہ پیش کیا اور آذربائیجان کو پاکستان میں سرمایہ کاری کے وسیع مواقع سے فائدہ اٹھانے کی دعوت دی۔
ملاقات میں آذربائیجان کے وزیرِ معیشت نے پاکستان کے ساتھ مختلف شعبوں میں تعاون اور تجارت کے فروغ میں آذربائیجان کی گہری دلچسپی کا اظہار کیا۔ انہوں نے قابل تجدید توانائی اور انفراسٹرکچر میں سرمایہ کاری پر بھی بات کی۔
وزیرِ معیشت آذربائیجان نے پاکستان میں وائٹ آئل پائپ لائن اور دیگر منصوبوں میں پیش رفت پر اطمینان کا اظہار کیا اور دونوں ممالک کے درمیان تعاون میں مزید بہتری لانے کی امید ظاہر کی۔
ملاقات میں آذربائیجان کے وزیرِ معیشت میکائیل جباروف، سفیر خضر فرہادوف، نائب وزیرِ معیشت صمد بشیری، نائب وزیرِ توانائی کمال عباسوف، اسحاق ڈار اور دیگر اعلیٰ حکام شریک تھے۔
