اسلام آباد(نیوز ڈیسک)وفاقی وزیر داخلہ محسن نقوی نے کہا ہے کہ وفاقی حکومت کی موثر حکمت عملی اور یورپی ممالک کے ساتھ اشتراکِ عمل کے نتیجے میں ایک برس کے دوران یورپ کےلئے انسانی سمگلنگ کی شرح میں 47 فیصد کی نمایاں کمی ریکارڈ کی گئی ہے، جس پر یورپی یونین نے بھی وزارتِ داخلہ کے اقدامات کو سراہا ہے۔
حکومت انسانی سمگلنگ اور غیر قانونی نقل و حمل کی روک تھام کے لئے زیرو ٹالرنس پالیسی پر سختی سے عمل پیرا ہے اور تمام ادارے اس نیٹ ورک کے خاتمے کے لئے مربوط انداز میں کام کر رہے ہیں۔انسانی سمگلنگ اور غیر قانونی نقل و حمل کی روک تھام کے عالمی دن کے موقع پر اپنے خصوصی پیغام میں وفاقی وزیر داخلہ محسن نقوی نے کہا کہ انسانی سمگلنگ ایک سنگین بین الاقوامی جرم اور انسانیت کے خلاف ظلم ہے، اور معصوم جانوں کے استحصال میں ملوث عناصر کسی رعایت کے مستحق نہیں۔ بین الاقوامی تعاون اور جدید ٹیکنالوجی کے استعمال سے سرحدی نگرانی اور امیگریشن نظام کو مزید موثر بنایا گیا ہے جس کے مثبت اور حوصلہ افزا نتائج سامنے آ رہے ہیں ۔
وزیر داخلہ محسن نقوی نے اس بات پر زور دیا کہ پاکستان انسانی سمگلنگ کے خاتمے کے لیے عالمی کوششوں کا بھرپور حصہ ہے اور اس سلسلے میں عوامی آگاہی وقت کی اہم ضرورت ہے۔ انہوں نے عزم کا اعادہ کیا کہ ہم آج انسانی سمگلنگ کے خلاف متحد ہو کر ایک محفوظ اور باوقار معاشرے کی تشکیل میں اپنا بھرپور کردار ادا کریں گے۔
