سرگودھا(نیوز ڈیسک)جماعت اسلامی پاکستان کے مرکزی امیر حافظ نعیم الرحمان نے کہاہے کہ ہمارے ٹیکسوں کے پسیوں سے اربوں روپے کی تشہیر ہو رہی ہے صرف صوبہ پنجاب میں ایک کروڑ سے زائد بچے اسکولوں سے باہر ہیں اورحکومت کے پاس آئی ٹی کی تعلیم دینے کے لیے کوئی منصوبہ نہیں اس وقت کامرس اسکولز کو ختم کیا جا رہا ہے ملک میں 70سے 80لاکھ نونہالان وطن منشیات کا شکار ہیں، اگر حکمرانوں کی پالیسی درست ہو تو ملکی قرضہ ختم ہو سکتا ہے۔
تفصیلات کے مطابق پاکستان جماعت اسلامی کے مرکزی امیر حافظ نعیم الرحمان نے سرگودھا آمد پر الخدمت فاونڈیشن کے بنو قابل پروگرام کی گریجویشن تقریب سے خطاب کرتے ہوئے کہا کہ بنوقابل پروگرام کے ذریعے نوجوان بہتر روزگار کمانے کے قابل ہو رہے ہیں جو مزید پڑھنا چاہتے ہیں ان کو ہم پڑھائیں گے،حافظ نعیم الرحمان نے کہا کہ بنوقابل پروگرام میں سو فیصد مفت تعلیم دی جا رہی ہے، اس وقت سب سے مشکل اچھے اساتذہ کو تلاش کرنا ہے،ہمارے اساتذہ نے محنت کر کے کورسز مکمل کرائے اب مختلف شہروں میں کیمپسز بن چکے ہیں،اگر ضرورت ہوئی تو سرگودھا میں مزید کیمپسز بنائے جائیں گے،اس پروگرام میں الخدمت فانڈیشن اور جماعت اسلامی کے والنٹیرکام کرتے ہیں،ایڈوانس کورسز میں بھی بہترین طریقے سے یہ سلسلہ آگے بڑھے گا ہم نے نوجوانوں کا ہاتھ تھام کر انہیں قابل بنایا ہے اب آپ کی ذمہ داری ہے آپ ہمارے سفیر بنیں سرگودھا میں ایک لاکھ کے قریب بچے اسکولوں سے باہر ہیں یہ بچے کسی مکینک کے پاس یا بھٹے میں کام کر رہے ہیں،یہ حکومت کا کام ہے کہ نوجوانوں کو معیاری تعلیم دے۔
حافظ نعیم الرحمان نے کہا کہ پاکستان کا آئین کہتا ہے کہ سب کو تعلیم دینا حکومت کی ذمہ داری ہے جس میں سب کو ایک معیار کی تعلیم ملنی چاہئے، جو بنیادی حق ہے ہمارے بنوقابل پروگرام میں 14لاکھ بچے رجسٹرڈ ہو چکے ہیں۔جب جماعت اسلامی تعلیم فراہم کر سکتی ہے تو ریاست کیوں نہیں؟حکومتی سیکٹرز میں تعلیم مہنگی ہوتی جا رہی ہے۔سرگودھا ضلع میں 20 فیصد طلبہ نے میٹرک کیا ہے۔ہمارے بچوں کو کیوں نہیں پڑھایا جا رہا؟ حالانکہ سب کو مواقع فراہم کرنا حکومت کی ذمہ داری ہے،حافظ نعیم الرحمان نے کہا کہ پاکستان میں 70سے 80لاکھ نوجوان منشیات کا شکار ہو چکے ہیں پنجاب میں ہمارے ٹیکسوں کے پسیوں سے اربوں روپے کی تشہیر ہوتی ہے جہاں اس وقت ایک کروڑ سے زائد بچے اسکولوں سے باہر ہیں۔اس وقت کامرس کے اسکولز ختم کیے جا رہے ہیں۔ پنجاب حکومت کے پاس آئی ٹی کی تعلیم دینے کے لیے کوئی منصوبہ نہیں ہے اگر آپ کی پالیسی ٹھیک ہو تو ملکی قرضہ ختم ہو سکتا ہے۔جو کرنے کا کام ہے وہ پنجاب حکومت نہیں کرتی۔ہمارے پیسوں سے تشہیر کروا کر ظاہر کرتے ہیں بہت کام ہو رہا ہے یہ جتنے بھی دعوے کریں کام کوئی نہیں ہو رہا۔پاکستان میں اب تک امیر غریب کو ایک جیسی تعلیم، انصاف، امن نہیں ملا،حافظ نعیم الرحمان نے کہا کہ اب یہاں نظام بدلنے کی ضرورت ہے۔جس کے لئے عوام کو جماعت اسلامی کے ساتھ مل کر جہدوجہد کا آغاز کرنا ہو گا۔اس موقع پر حافظ نعیم الرحمان کا پاس آوٹ طلبہ کی جانب سے لگائے گے اسٹالز کا دورہ کر کے ان کی خدمات کو سراہا اس تقریب میں بنو قابل پروگرام میں پاس آوٹ ہونیوالے ایک ہزار سے زائد طلبہ وطالبات نے شرکت کی۔
٭٭٭٭٭
