لاہور(کرائم رپورٹر) پولیس کے مبینہ تشدد پر گجرات میں خواجہ سراء آپے سے باہر ہوگئے اور تھانے پر دھاوا بول دیا، تھانے میں توڑ پھوڑ اور ملازمین کو گریبانوں سے پکڑ کر گھسیٹتے رہے جبکہ تھانے کا سامان اٹھا کر اپنے ساتھ لے گئے۔
تفصیلات کے مطابق کھاریاں میں دوران گشت پولیس نے حرا نامی خواجہ سراء اور اس کے ساتھی مرد کو روک کر تلاشی لی جس پر تلخ کلامی ہوئی اور پولیس اہلکار حرا اور اس کے ساتھی کو تھانہ صدر لے گئے جہاں پر خواجہ سراء اور اس کے ساتھی پر تشدد کیا گیا اور پھر چھوڑ دیا گیا۔
اپنے ساتھی خواجہ سراء پر تشدد کرنے اور حبس بے جا میں رکھنے پر خواجہ سراء کمیونٹی نے تھانے پر پتھرائو کیا اور سامان اٹھا کر باہر سڑک پر لے گئے اور پولیس بیئرز لگا کر جی ٹی روڈ کو بلاک کردیا ۔
پولیس کے رویے پر کھاریاں کے خواجہ سراء جمع ہو کر تھانے میں گھس گئے، سامان کی توڑ پھوڑ کی اور پھر جی روڈ کو بلاک کر کے احتجاج شروع کر دیا، جسے پولیس اہلکاروں نے لاٹھی چارج کر کے منتشر کردیا۔ متعلقہ ایس ایچ او بلال شاہ کے مطابق ڈی پی او گجرات نے خواجہ سراؤں کے ساتھ زیادتی کرنے والے پولیس اہلکاروں کو معطل کر دیا۔
ڈی پی او گجرات نے واقعہ کا نوٹس لیتے ہوئے رپورٹ طلب کرلی جبکہ ابتدائی رپورٹ کی روشنی میں گنہگار ثابت ہونےوالے اہلکاروں کے خلاف مقدمہ درج کرکے گرفتار کرلیا گیا ۔
