ممبئی(شوبز نیوز )بالی ووڈ اداکارہ دیا مرزا نے اپنی نجی زندگی سے متعلق انکشاف کرتے ہوئے کہا ہے کہ والدین کی علیحدگی نے ان کی شخصیت، سوچ اور زندگی کے بنیادی اصولوں کی تشکیل میں گہرا کردار ادا کیا۔ انہوں نے دیانت داری، سماجی ذمہ داری اور اصولوں پر ثابت قدم رہنے کا سبق اپنے والد سے سیکھا۔
44 سالہ اداکارہ نے ایک پوڈکاسٹ میں گفتگو کے دوران بتایا کہ ان کے والد انتہائی اصول پسند انسان تھے اور مالی مشکلات کے باوجود کبھی اپنے نظریات پر سمجھوتہ نہیں کرتے تھے۔دیا مرزا نے کہا کہ ان کے والد ہر فیصلے میں اخلاقی اقدار کو ترجیح دیتے تھے اور ایسے کاموں سے دور رہتے تھے جنہیں وہ غلط سمجھتے تھے۔
اداکارہ کے مطابق والدین کے درمیان اختلافات کی ایک بڑی وجہ بھی یہی تھی کہ ان کے والد اس بات پر سخت مقف رکھتے تھے کہ وہ کن منصوبوں کا حصہ بنیں گے اور کن کا نہیں۔انہوں نے ایک واقعہ بیان کرتے ہوئے بتایا کہ ان کے والد نے ایک ایسی فیکٹری میں کام کرنے سے انکار کر دیا تھا جو صنعتی فضلہ قریبی دریا میں پھینکتی تھی۔ اس وقت خاندان مالی دبا کا شکار تھا، لیکن اس کے باوجود ان کے والد نے بہتر آمدنی کے بجائے اپنے اصولوں کو ترجیح دی اور غیر اخلاقی سرگرمی سے وابستہ ہونے سے انکار کر دیا۔
اداکارہ کا کہنا تھا کہ اس فیصلے نے ان کی زندگی پر دیرپا اثرات چھوڑے۔ انہوں نے اسی واقعے سے یہ سیکھا کہ بعض اوقات صحیح فیصلہ آسان نہیں ہوتا اور اس کی قیمت ذاتی زندگی میں بھی ادا کرنا پڑتی ہے، لیکن اصولوں پر قائم رہنا ہی اصل کامیابی ہے۔دیا مرزا نے مزید کہا کہ زندگی میں ایسے مواقع آتے ہیں جب بالغ افراد کو مشکل انتخاب کرنا پڑتے ہیں۔ اگرچہ ان فیصلوں کے نتائج تکلیف دہ ہو سکتے ہیں، تاہم اپنی اقدار اور اخلاقی اصولوں کا ساتھ نہ چھوڑنا ہی انسان کے کردار کی اصل پہچان ہے
