نجی سکولوں میں بغیر اجازت غیر نصابی سرگرمیاں کروانے پر پابندی عائد ،مراسلہ جاری

لاہور (تعلیم ڈیسک ) ڈسٹرکٹ ایجوکیشن اتھارٹی لاہور نے نجی سکولوں میں بغیر اجازت غیر نصابی سرگرمیاں کروانے پر پابندی لگادی۔

ایجوکیشن اتھارٹی نے قواعد وضوابط کے مطابق پروگرامز منعقد کروانے کے حوالے سے نجی سکولوں کو باقاعدہ مراسلہ جاری کردیا ۔جس کے مطابق پرائیویٹ سکولوں میں غیرنصابی سرگرمیوں کروانے کے لئے اجازت لینی ہوگی،

غیرنصابی سرگرمیوں کیلئے ایجوکیشن اتھارٹی کو درخواست لکھنا ہوگی، ایجوکیشن اتھارٹی درخواست پر اجازت نامہ جاری کرے گی، بغیر اجازت غیر نصابی سرگرمیاں منعقد کروانے والے سکولوں کے خلاف سخت کارروائی عمل میں لائی جائے گی۔

دوسری جانب پنجاب ایگزامینیشن کمیشن نے فروری میں بچوں کی لارج سکیل اسیسمنٹ کرنے کا فیصلہ کرلیا، پائلٹ پراجیکٹ کے طور پر تیسری، چوتھی،چھٹی اور ساتویں جماعت کی لارج سکیل اسیسمنٹ کی جائے گی، ایل ایس اے امتحان کیلئے اساتذہ کی تربیت کا آغاز آئندہ ہفتے کیا جائیگا، امتحان کیلئے سٹیشنری کا سامان سکولوں میں بچوں کی تعداد کے مطابق فراہم کیا جائے گا۔ڈسٹرکٹ فوکل پرسن پیک کے نمائندے کے ساتھ مل کر ٹیسٹ ایڈمنسٹریٹرز کو تربیت دیں گے،ایل ایس اے کے بعد سکول بیسڈ اسیسمنٹ مارچ میں منعقد کیا جائے گا،31مارچ کو نتائج اوریکم اپریل سے نئے تعلیمی سال کا آغاز ہوگا، پنجاب بھر کے 6 ہزار منتخب سکولوں میں امتحان لیا جائے گا،صوبہ بھر کے چھ ہزارسکولوں میں بچوں کا ٹیسٹ ہوگا۔