غیر ملکی خواتین سے متعلق کیس میں ملوث کسی بھی شخص کو معافی نہیں ملے گی،ملک محمد احمد خان

سرگودھا (نیوز ڈیسک )اسپیکر پنجاب اسمبلی ملک محمد احمد خان نے واضح کیا ہے کہ لاہور میں غیر ملکی خواتین کے مبینہ اغوا و زیادتی کیس میں ملوث کسی بھی شخص کو معاف نہیں کیا جائے گا۔

چیمبر آف کامرس کے دورے کے موقع پر میڈیا سے گفتگو کرتے ہوئے ملک محمد احمد خان نے کہا کہ پنجاب میں قانون کی حکمرانی ہے، غیر ملکی خواتین کے معاملے میں قانون راستہ اپنا رہا ہے، میں ہوں یا میرا بیٹا، قانون کی نظر میں سب برابر ہیں، وزیر اعلی پنجاب مریم نواز کا واضح حکم ہے کہ ملک میں قانون کی بالادستی ہوگی۔اسپیکر پنجاب اسمبلی نے کہا کہ کرپشن ایک سنجیدہ مسئلہ بن چکا ہے، جس کے خاتمے کیلئے بھرپور اقدامات کی ضرورت ہے، کرپشن کے خاتمے کیلئے قانون اور نیب جیسے کالے قوانین بھی موجود ہیں، جسٹس جاوید اقبال جیسے لوگوں نے ماضی میں نیب کو شرمناک طریقے سے استعمال کیا، آئین و قانون کے مطابق کسی فرد واحد کے پاس لامحدود اختیارات نہیں ہونے چاہییں۔

ملک محمد احمد خان نے مزید کہا کہ ستھرا پنجاب صوبے کی سب سے بڑی انویسٹمنٹ ہے، پنجاب حکومت اور اپوزیشن کو برابر حصہ دیا گیا، میری دعا ہے کہ حکومت اور اپوزیشن کے درمیان سیاسی کشیدگی میں کمی واقع ہو۔اسپیکر پنجاب اسمبلی نے چیمبر آف کامرس کے عہدیداران سے اہم ملاقات بھی کی، ملک محمد احمد خان نے تاجر برادری کے مسائل ترجیحی بنیادوں پر حل کرنے کی یقین دہانی کروا دی۔