شہباز شریف ایسے ڈرائیور ہیں جن کے پاس گاڑی تو موجود ہے پیٹرول نہیں ،بیرسٹرسیف

پشاور(نمائندہ خصوصی)وزیراعلیٰ خیبرپختونخوا کے معاون خصوصی اطلاعات بیرسٹر محمد علی سیف نے کہا ہے کہ چیئرمین تحریک انصاف عمران خان کی عوامی مقبولیت کے خوف سے امپورٹڈ وزیراعظم اور کابینہ ذہنی توازن کھو چکی ہیں،

 

وزیراعظم ایسی گاڑی چلا رہے ہیں جس میں پیٹرول ہی نہیں اور جو کوئی انہیں ملے اس سے پیسے مانگنا شروع کر دیتے ہیں، اس صورتحال میں یہ نظام حکومت کیسے چلائیں گے۔ اپنے دفتر سے جاری ایک بیان میں بیرسٹر محمد علی سیف نے کہا کہ تحریک انصاف ملک کی سب سے بڑی سیاسی جماعت ہے اور عمران خان مقبول ترین عوامی لیڈر ہیں،امپورٹڈ وزیراعظم اور کابینہ عمران خان کی بے پناہ عوامی مقبولیت کے خوف سے ذہنی توازن کھو کھو چکی ہیں اور آئے دن عمران خان کو سیاسی میدان سے بے دخل کرنے کے لیے نت نئے ہتھکنڈوں کا استعمال کر رہے ہیں تاہم اب تک اس میں بری طرح ناکام ہیں اور رہیں گے،پی ڈی ایم کی 11 جماعتوں کے نام نہاد تجربہ کار ڈھنگ سے حکومت نہیں چلا پارہے ہیں اور نہ ہی انہیں سمجھ آرہی ہے کہ عوام کو کیسے ریلیف فراہم کریں، امپورٹڈ حکومت میں شامل جماعتوں کی سرتوڑ کوششیں صرف لوٹی ہوئی دولت کو محفوظ کرنے کے لیے حکومت کا ایک ایک دن بچانے کے لیے ہیں۔ بیرسٹر سیف نے کہا کہ شہباز شریف ایسے ڈرائیور ہیں جن کے پاس گاڑی تو موجود ہے لیکن پیٹرول نہیں ہے اور انہیں کہیں کوئی راستے میں ملے تو یہ فورا اس سے پیسے مانگنا شروع کر دیتے ہیں، وزیراعظم ہر ہفتے کسی نہ کسی بیرونی دورے پر ہوتے ہیں ایسی صورت حال میں یہ کیا ملک چلا پائیں گے۔