جنرل عاصم منیر کی فیلڈ مارشل کے طور پر تاریخی تقرری، ایوانِ صدر میں شاندار تقریب آج ہوگی

آرمی چیف جنرل سید عاصم منیر کو فیلڈ مارشل کے رینک پر ترقی دینے کی پُروقار تقریب آج سہ پہر ساڑھے 4 بجے ایوانِ صدر اسلام آباد میں منعقد ہوگی، جہاں انہیں فائیو اسٹار جنرل کے بیجز لگائے جائیں گے۔

اس خصوصی تقریب میں وزیر اعظم شہباز شریف، اہم وفاقی وزرا، عسکری قیادت اور دیگر اعلیٰ حکومتی شخصیات کی شرکت متوقع ہے۔

حکومت پاکستان کی جانب سے جنرل عاصم منیر کو یہ اعزاز ان کی جرات مندانہ قیادت، آپریشن بُنیان مرصوص کی کامیاب حکمت عملی اور ملکی سلامتی کے لیے ان کی بے مثال خدمات کے اعتراف میں دیا گیا ہے۔

قابلِ ذکر بات یہ ہے کہ جنرل عاصم منیر پاکستان کے دوسرے آرمی آفیسر ہیں جنہیں فیلڈ مارشل کے اعلیٰ ترین رینک سے نوازا جا رہا ہے۔ اس سے قبل صرف جنرل ایوب خان کو 1959 میں یہ اعزاز حاصل ہوا تھا۔

فیلڈ مارشل کا عہدہ پاکستانی فوج کا سب سے بلند رینک ہوتا ہے، جو صرف ان شخصیات کو عطا کیا جاتا ہے جنہوں نے جنگی حکمتِ عملی اور قومی دفاع میں غیر معمولی کارکردگی دکھائی ہو۔