ریاض (انٹرنیشنل نیوز)سعودی وزیر توانائی شہزادہ عبدالعزیز بن سلمان نے اعلان کیا ہے کہ تیل کی قیمتوں پر زیادہ سے زیادہ کی حد لگانا لامحالہ مارکیٹ میں عدم استحکام کا باعث بنے گا۔
میڈیارپورٹس کے مطابق سعودی وزیر توانائی نے مزید کہا کہ ہم کسی ایسے ملک کو تیل فروخت نہیں کریں گے جو ہماری سپلائیوں پر قیمتوں کی حد نافذ کرے۔انرجی انٹیلی جنس کے ساتھ ایک انٹرویو میں توانائی کے وزیر نے سال کے آخر تک پیداوار میں کمی کے لیے اوپیک پلس معاہدے کو برقرار رکھنے کے عزم کی توثیق کی ۔
انہوں نے مزید کہا کہ عالمی طلب میں اضافہ عالمی فاضل پیداواری صلاحیت کی موجودہ سطح سے تجاوز کر جائے گا اور ہنگامی ذخائر کم ہوتے جائیں گے۔ گزشتہ جمعرات کو سعودی وزیر خارجہ شہزادہ فیصل بن فرحان نے کہا تھا کہ مملکت توانائی کی عالمی منڈی کے استحکام کا خواہاں ہے۔ انہوں نے مستحکم مارکیٹ کے لیے سعودی عرب کے عزم کا اظہار کرتے ہوئے کہا تھا کہ مارکیٹ کو سال کے آخر تک پیداوار میں تبدیلیوں کی ضرورت نہیں ہے۔
سعودی وزیر توانائی نے کہا کہ ہم نے اپنی تیل کی پیداواری صلاحیت کو 2027 تک 13.3 ملین بیرل یومیہ تک بڑھانا شروع کر دیا ہے۔ سعودی وزیر نے توقع ظاہر کی کہ 2025 میں ہماری تیل کی پیداواری صلاحیت کی توسیع میں پہلے اضافے کا نفاذ ہو گا۔
