منامہ (نمائندہ خصوصی)بحرین کے اسپتال نے اسرائیل اور حماس کے درمیان جاری تنازع کے دوران سوشل میڈیا پر فلسطین مخالف تبصرے پوسٹ والے بھارتی نژاد ڈاکٹر کو عہدے سے برطرف کردیا۔غیرملکی خبررساں ادارے کے مطابق ڈاکٹر سنیل را نے ایکس پر فلسطین مخالف کئی پوسٹس پوسٹ کیں، جن کی جانب ایکس پر ایک صارف نے بحرینی حکام کی توجہ دلائی۔
ڈاکٹرسنیل را کا کہنا تھا کہ اسرائیل مسلمانوں پر حملوں میں ملوث ہیں، فلسطینیوں کا خاتمہ کر دینا چاہیے۔رائل بحرین اسپتال نے ایکس پرڈاکٹررا کے اقدامات کے حوالے سے ایک بیان جاری کرتے ہوئے کہا، یہ بات ہمارے علم میں آئی ہے کہ ڈاکٹر سنیل را، جوانٹرنل میڈیسن کے ماہر کے طور پر کام کر رہے ہیں، نے سوشل میڈیا پر ایسی ٹویٹس پوسٹ کی ہیں جو ہمارے معاشرے کے لیے ناگوار ہیں۔ ہم اس بات کی تصدیق کرنا چاہیں گے کہ ان کی پوسٹس اور نظریہ ذاتی ہیں اور اسپتال کی رائے اور اقدار کی عکاسی نہیں کرتیں۔
یہ ہمارے ضابطہ اخلاق کی خلاف ورزی ہے۔ ہم نے ضروری قانونی کارروائی کرتے ہوئے ان کی ملازمت فوری ختم کر دی ہے۔تنازع کے جواب میں، ڈاکٹررا نے اپنے بیانات کی غیر حساسیت تسلیم کرتے ہوئے ایکس پر معافی نامہ جاری کیا۔انہوں نے لکھاکہ میں نے اس پلیٹ فارم پر جو بیان پوسٹ کیا اس کے بارے میں معذرت چاہتا ہوں۔ موجودہ واقع کے تناظر میں یہ غیر حساس تھا۔ بطور ایک ڈاکٹرتمام زندگیوں کی اہمیت ہے۔
میں اس ملک، اس کے لوگوں اور اس کے مذہب کا دل سے احترام کرتا ہوں۔اسپتال نے اپنی ویب سائٹ سے ڈاکٹر را کا پروفائل ہٹا دیا ہے۔ ایکس پروفائل کے مطابق، تقریبا 20 سال کے تجربے کے ساتھ انٹرنل میڈیسن کے ماہر ہیں۔ وہ وشاکھاپٹنم میں آندھرا میڈیکل کالج اور کرناٹک کے منگلورو میں کستوربا میڈیکل کالج کے سابق طالب علم ہیں۔
