واشنگٹن: امریکی توانائی حکام نے ایک اہم سنگ میل عبور کرتے ہوئے اعلان کیا ہے کہ ملک میں پہلی بار ایک کمرشل جوہری ری ایکٹر میں 5 فیصد سے زیادہ افزودہ یورینیم استعمال کیا جا رہا ہے۔
محکمہ توانائی کے مطابق، یہ زیادہ افزودہ ایندھن نہ صرف بجلی کی زیادہ پیداوار میں مدد دے گا بلکہ ری ایکٹر کی کارکردگی اور مدت کو بھی بہتر بنائے گا۔
عام طور پر کمرشل نیوکلیئر ری ایکٹرز میں 3 سے 5 فیصد افزودہ یورینیم استعمال ہوتا ہے، تاہم نئے تجرباتی ایندھن میں یورینیم کی افزودگی اس سطح سے بڑھا دی گئی ہے تاکہ زیادہ توانائی پیدا کی جا سکے۔
یہ ایندھن زیادہ عرصے تک چلنے والا ہوگا، جس سے ری ایکٹر کی دیکھ بھال کے اخراجات میں کمی آئے گی۔ تجربات کا آغاز جارجیا کی ایک تنصیب میں ہو چکا ہے، جہاں آئندہ چار سالوں تک جانچ جاری رہے گی۔
