لاہور(نمائندہ خصوصی) جواد رفیق ملک کا تعلق پاکستان ایڈمنسٹریٹو سروس کے 15ویں کامن سے ہے۔ بطور چیف سیکرٹری پنجاب تعیناتی سے قبل وہ وفاقی سیکرٹری کمیونیکیشن ڈویژن خدمات سر انجام دے رہے تھے۔ جواد رفیق ملک پنجاب میں سینئر ممبر بورڈ آف ریو نیو، سیکرٹری صحت، سیکرٹری بلدیات،کمشنر لاہور ڈویژن، ڈائریکٹر فوڈ پنجاب اور ایڈیشنل سیکرٹری داخلہ سمیت دیگر اہم عہدوں پر فرائض سر انجام دے چکے ہیں۔
چارج سنبھالنے کے بعد چیف سیکرٹری پنجاب نے اعلیٰ سطحی اجلاس کی صدارت کی۔ سینئر ممبر بورڈ آف ریونیو بابر حیات تارڑ، ایڈیشنل چیف سیکرٹری داخلہ مومن آغا، سیکرٹری سپیشلائزڈ ہیلتھ نبیل اعوان، سیکرٹری پرائمری ہیلتھ کیپٹن (ر) محمد عثمان اور سیکرٹری صنعت ظفر اقبال نے چیف سیکرٹری کو بریفنگ دی۔
چیف سیکرٹری پنجاب نے کہا کہ حکومتی پالیسی کے مطابق عوامی مسائل کا حل، گورننس اور پبلک سروس ڈلیوری کی بہتری ترجیح ہونی چاہئے۔عوام کو ریلیف کی فراہمی کیلئے ہمیں حکومتی احکامات پر انکی روح کے مطابق عمل کرنا ہوگا۔کورونا وائر س، ڈینگی اور دیگر چیلنجز سے نبرد آزما ہونے کیلئے ہمیں بطور ٹیم کام کرنا ہوگا۔
جواد رفیق کو دو روز قبل کیپٹن ر اعظم سلیمان کو ہٹانے کے بعد چیف سیکرٹری پنجاب تعینات کیا گیا تھا