اسلام آباد(نیوز رپورٹر)وزیراعظم شہباز شریف نے ازبکستان کیساتھ کئے گئے فیصلوں پر فوری عملدرآمد یقینی بنانے کی ہدایت کر دی۔وزیراعظم سے ازبکستان کے سفیر علی شیر تختا ئیف نے وزیراعظم ہا ﺅس میں ملاقات کی۔
ملاقات میں وزیر اعظم شہباز شریف نے ازبک سفیر کے ذریعے صدرشوکت مرزیوئیف کیلئے نیک خواہشات کا اظہار کیا اور گزشتہ ماہ تاشقند کے دورے کے دوران ان کے اور پاکستانی وفد کی مہمان نوازی کیلئے تہہ دل سے شکریہ ادا کیا۔وزیراعظم نے دورے کے دوران دونوں ممالک کے مابین دوطرفہ تعلقات پر ہونیوالی شاندار پیشرفت پر اطمینان کا اظہار کیا، جس میں اعلی سطح سٹریٹجک تعاون کونسل کی تشکیل کیساتھ ساتھ مختلف شعبوں میں متعدد اہم معاہدوں اور مفاہمتی یادداشتوں پر دستخط بھی شامل ہیں۔
شہباز شریف نے کہا کہ تاشقند سے واپسی پر متعلقہ شعبوں کے وزرا کو ذمہ داری سونپی ہے کہ وہ دورے کے دوران ہوئے فیصلوں پر فوری عمل درآمد کو یقینی بنائیں۔وزیراعظم نے دوطرفہ تجارت کو 2 بلین ڈالر تک بڑھانے کیلئے کام کرنے کیلئے ایک روڈ میپ وضع کرنے کی ضرورت پر بھی زور دیا، جس پر دورے کے دوران دونوں رہنماﺅں کے مابین اتفاق کیا گیا تھا۔
اس موقع پر ازبک سفیر نے وزیر اعظم کی نیک خواہشات پر شکریہ ادا کیا اور کہا کہ صدر شوکت مرزیوئیف پاکستان کے ساتھ تعلقات کو مضبوط بنانے اور دونوں ممالک کے درمیان بہترین سیاسی تعلقات کو باہمی طور پر مفید اقتصادی تعلقات میں تبدیل کرنے کیلئے پرعزم ہیں۔ازبک سفیر کا کہنا تھا کہ صدر مرزیوئیف نے رواں برس کے آخر میں پاکستان کا سرکاری دورہ کرنے کی وزیر اعظم کی دعوت قبول کر لی ہے۔
