ممبئی (شوبز ڈیسک)بولی وڈ کے ‘بادشاہ’ کہلانے والے شاہ رخ خان نے خود پر اور اپنی آنے والی فلم ‘پٹھان’ پر تنقید اور بائیکاٹ کے ٹرینڈز چلنے پر پہلی بار مبہم مگر منفرد انداز میں بات کرکے بھارتیوں کے دل جیت لیے۔
شاہ رخ خان کی فلم ‘پٹھان’ آئندہ ماہ جنوری میں ریلیز ہوگی اور اس کا گانا ‘بے شرم’ رنگ چند دن قبل ریلیز کیا گیا تھا، جسے دیکھنے کے بعد تنگ نظر ہندو سیخ پا ہوگئے اور انہوں نے اداکار کی فلم ‘پٹھان’ کے بائیکاٹ کا ٹرینڈ چلانا شروع کردیا جب کہ انتہاپسند جماعتوں نے بھی فلم پر پابندی لگانے کا مطالبہ کردیا۔انتہاپسند ہندوئوں کی جانب سے اپنے اور اپنی فلم کے خلاف ہونے والے ہنگامے سمیت سوشل میڈیا پر ہونے والی تنقید کے بعد شاہ رخ خان 15 دسمبر کو ریاست بنگال کے شہر ‘کولکتا’ میں ہونے والے عالمی فلم فیسٹیول میں پہنچے، جہاں انہوں نے منفرد انداز میں خطاب کیا۔شاہ رخ خان نے کولکتا انٹرنیشنل فلم فیسٹیول (کے آئی ایف ایف) میں خطاب کرتے ہوئے سوشل میڈیا پر منفی اور تنگ نظر باتیں اور نظریے پھیلانے پر کھل کر بات کی اور اسے معاشرے کے لیے نقصان دہ قرار دیا۔
شاہ رخ خان نے اپنے خطاب میں کہا کہ سوشل میڈیا کا منفی پھیلائو سینما پر اثر انداز ہو رہا ہے اور سوشل میڈیا پر تنگ نظر اور غلط باتیں مجموعی طور پر ہمارے معاشرے کے بیانیے کو بیان کرتی ہیں۔انہوں نے کہا کہ سوشل میڈیا ایک مخصوص تنگ نظری کے ساتھ چلتا ہے جو کہ انسانی فطرت اور آزادی پر اثر انداز ہوکر مثبت اجتماعی سوچ کو تباہ کر دیتا ہے۔شاہ رخ خان نے اپنے خلاف ہونے والے مظاہروں اور ٹرینڈز کا ذکر کیے بغیر سوشل میڈیا کی نفرت انگیز مہم پر بات کرتے ہوئے سینما کو اس کا بہتر متبادل قرار دیا۔انہوں نے خطاب کے آخر میں ہندی زبان میں بات کرتے ہوئے اپنی آنے والی فلم ‘پٹھان’ کے انداز میں فلم کا ہی ایک ڈائیلاگ ‘زندہ ہیں’ کہا تو ہجوم نے ان کے لیے تالیاں بجائیں اور لوگوں کے چہروں پر مسکراہٹ بکھر آئی۔
شاہ رخ خان نے آخر میں کہا کہ ‘دنیا کچھ بھی کرلے، میں اور آپ لوگ اور جتنے بھی مثبت لوگ ہیں، سب کے سب ۔۔ زندہ ہیں۔شاہ رخ خان کی جانب سے ‘زندہ ہیں’ کا جملہ مخصوص اور منفرد انداز میں ‘پٹھان’ فلم کے ڈائیلاگ کی طرز پر بولنے پر لوگ کھل اٹھے اور انہوں نے اداکار کے لیے تالیاں بجائیں۔
٭
