لاہور ( سپورٹس ڈیسک) پاکستان سپر لیگ کے دوران پاکستان ویمن لیگ کے لیے آزمائشی میچز کرانے کی منصوبہ بندی کی جارہی ہے۔
ذرائع کے مطابق لاہور قلندرز اور کراچی کنگز سمیت 3 فرنچائزز ویمن ٹیمیں بنائیں گی اور آزمائشی طور پر 5 میچز کرائے جاسکتے ہیں۔اس حوالے سے ذرائع کا کہنا ہے کہ ٹیسٹ رن کے لیے فرنچائزز میچز کے اخراجات برداشت کریں گی۔ذرائع کے مطابق 5ٹیسٹ رن میچوں کے تجربے کی روشنی میں اس سال ستمبر، اکتوبر میں پاکستان ویمنز لیگ کرائے جانے کی تجویز دی گئی ہے۔
پاکستان ویمنز لیگ ابتدائی طور پر 4سے 6ٹیموں پر مشتمل ہوگی،ویمنز ٹیموں کو بھی اوپن بڈنگ کے ذریعے فروخت کیا جائے گا۔واضح رہے کہ پی ایس ایل گورننگ کونسل کے اجلاس میں گزشتہ روز پاکستان ویمنز لیگ کا معاملہ زیر بحث آیا تھا۔
