لاہور (ہیلتھ رپورٹر)نگران صوبائی وزیر صحت ڈاکٹر جاوید اکرم نے مقامی ہوٹل میں عالمی ادارہ صحت، منسٹری آف نیشنل ہیلتھ اور محکمہ پرائمری اینڈ سیکنڈری ہیلتھ کیئر کے زیر اہتمام دوسری جوائنٹ ایکسٹرنل ایوی لوایشن پاکستان 2023 میں بطور مہمان خصوصی شرکت کی۔
سپیشل سیکرٹری محکمہ سپیشلائزڈ ہیلتھ کیئر اینڈ میڈیکل ایجوکیشن سید واجدعلی شاہ نے بطور گیسٹ آف آنر شرکت کی۔اس موقع پر نگران صوبائی وزیر محکمہ پرائمری اینڈ سیکنڈری ہیلتھ کیئر ڈاکٹر جمال ناصر، سیکرٹری صحت علی جان خان، ڈی جی ریسکیو ڈاکٹر رضوان ناصر، ڈی جی ہیلتھ سروسز ڈاکٹر الیاس گوندل، عالمی ادارہ صحت پنجاب کے انچارج ڈاکٹر جمشید، ڈاکٹر زرفشاں طاہر، منسٹری آف نیشنل ہیلتھ سے ڈاکٹر سلمان، ڈائریکٹر ای پی آئی ڈاکٹر مختار اعوان، پنجاب ہیلتھ کیئر کمیشن سے ڈاکٹر انور جنجوعہ، ڈاکٹر گلزار، ڈاکٹر نعیم مجید، محکمہ صحت کے افسران اور بیرون ممالک سے آئے طبی ماہرین کی کثیر تعداد نے شرکت کی۔
نگران صوبائی وزیر صحت ڈاکٹر جاوید اکرم نے کہاکہ پاکستانی عوام کو خطرناک بیماریوں سے محفوظ رکھنے کے لیے مربوط لائحہ عمل تیار کرنا ہوگا۔ آج پوری دنیا خطرناک بیماریوں سے بچاؤ کیلئے جدید ریسرچ اور ٹیکنالوجی کا استعمال کررہی ہے۔ ڈاکٹر جاوید اکرم نے کہاکہ بیماری کا کوئی بارڈر یا ریڈ لائن نہیں ہوتی،احتیاط ہمیشہ علاج سے بہتر ہوتی ہے۔ صوبائی وزیر صحت نے کہاکہ عوام تک صحت کی بہترسہولیات کی فراہمی حکومت پنجاب کی اولین ترجیح ہے۔
نگران وزیر اعلیٰ پنجاب محسن نقوی کے ویژن کے مطابق تمام کارڈیالوجی ہسپتالوں میں مریضوں کو پرائمری انجیو پلاسٹی کی 24/7 سہولت فراہم کی گئی ہے۔عوام کو صحت کی بہترسہولیات کی فراہمی کے منصوبہ جات قلیل عرصہ نہیں بلکہ ہمیشہ کیلئے ہونے چاہئیں۔صحت کے منصوبہ جات ہمیشہ سائنسی بنیادوں پر بنانے چاہئیں۔ انہوں نے کہاکہ چلڈرن ہسپتال لاہور بچوں کے علاج کے حوالہ سے دنیا کا سب سے بڑا ہسپتال ہے۔ صحت کے نظام میں بہتری کیلئے عملدرآمد کو بنیادی حیثیت حاصل ہے۔
نگران صوبائی وزیر صحت نے سیمینار کے انعقاد پر عالمی ادارہ صحت، منسٹری آف نیشنل ہیلتھ اور محکمہ پرائمری اینڈ سیکنڈری ہیلتھ کیئر کو مبارکباد دی۔نگران صوبائی وزیر محکمہ پرائمری اینڈ سیکنڈری ہیلتھ کیئر ڈاکٹر جمال ناصر نے کہاکہ نگران وزیر اعلیٰ پنجاب محسن نقوی کے ویژن کے مطابق عوام تک صحت کی بہترسہولیات کی فراہمی کیلئے کوشاں ہیں۔ ڈاکٹر جمال ناصرنے سیمینار کے انعقاد پر تمام سٹیک ہولڈرز کو مبارکباد دی۔
